~Hanan

It’s True, YOU are unlimited!
Just dig deep inside and you’ll be amazed by what you find down inside you.
Everyone is talented in someway

السلام عليكم،،

قبل فترة كنت اسولف مع كم بنت وع الاشياء اللي ممكن يسوونها وقت الفراغ، استغربت من الردود بصراحه. كيف الانسان يقول انه “غير موهوب” او “ما عندي هواية” والادهى والامر لما يقولون “ما اعرف اسوي *شيء*”.. معقوله الشخص يستهين بقدراته وعلى طول يحكم على نفسه انه ما يقدر؟!

اذكر كنت اسولف مع وحده قبل فترة وسألتني وش بتسوين بالصيف، مدة طويلة كيف تقضينها؟ وقبل ما اجاوبها قالت: اكيد سهر وتلفزيون وطلعات وجمعات بنات. استغربت من ردي هي لما قلت لها عندي اشياء كثير اسويها، قالت لي طيب شلون تسوين هالاشياء او بالاصح شلون عرفتي ان انتي تحبين تسوين هالاشياء؟

قلت لها اني خلال الصيف راح اتدرب اكثر على حفر الزجاج واني راح احاول اضيف اشياء ثانية غير الاكواب حتى استفيد اكثر من الوقت اللي اقضيه بالتدريب، واني راح احاول اصقل الرسم عندي لان الرسم موهبتي فيه صفر وهالشيء مهم لاني احتاجه بعد في الحفر. قالت لي بس هذا يعني طول الصيف كذا؟
قلت: لا مو بس كذا، عندي روايات اقرأها استمتع شوي، اشوف الكتب الموجودة بالبيت واقرأها، الصيف مو كله سهر وافلام و وناسه.

قالت طيب وش اسوي؟ قلت: تعلمّي تسوين شيء. استغربت من كلمتها “بس انا ما اعرف شيء”، سألتها عن الرسم عن مطالعة الكتب، لو عندها هوايات بوقت الفراغ تسويها، قالت: “ولا شيء!، رسم وما اعرف وكتب ومجلات وما احب اقرأ.”. بصراحه استغربت منها وسألتها ابي اعرف وش تسوي بوقت الفراغ وبكل بساطه قالت: “نت وتلفزيون وطلعات”

بصراحه ما كانت الوحيدة اللي تسأل وش تسوي وتبيني انصحها واعلمها وش تسوي.. يعني معقوله البنت ما تفكر تجرب شيء جديد؟
ما تحاول تكتشف هي وش تحب تسوي بوقت فراغها، وش تميل له؟

عن نفسي، ما كنت اتوقع ابداً اني القى نفسي بالتصوير! ولا كنت اشوف نفسي في يوم من الايام استخدم آله واحفر على الزجاج!! الاخيره بحد ذاتها كانت مجازفه كبيرة وخطره بنفس الوقت، لاني ما كنت ادري انا وش راح اعرّض نفسي له!؟
الكل استغرب من التصوير في البداية وليه كنت اميل له وكانوا يشوفون الموضوع “اسراف” لاني راح احط مبالغ بأدوات تصوير، طبعاً هالشيء من وجهة نظرهم هم لكن من ناحيتي كنت متحمسه (مع ان الحماس خفّ هالايام ‪ ‬ ) والحمد لله، اشوف نفسي عندي موهبة واقدر ابدع فيها..

المواهب والهوايات، ما هو شرط تكون كلها يدويّه، عمليّه. الواحد يبحث داخل نفسه ويشوف ميوله.
ممكن يكون كتابة قصص قصيرة، شعر، ممكن يكون تصميم خصوصاً ان هالوقت قليل الناس اللي ما عندها اجهزة كمبيوتر شخصية.
ممكن يكون اي شيء، المهم ان الواحد يسوي شيء يستمتع فيه ويحس بقيمة عمله.

صحيح اني ما لي كم شهر من بدأت احفر، بس النتيجة كانت تبهرني. الاحساس بالانجاز لحاله يكفيني، ما كنت افكر هل بيعجب غيري او لا بس كنت اشوف اللي صنعته بيدي.
لما طلبت مني كم بنت، كان لازم اعرف هم وش ودّهم والشكل، بعضهم قالوا على كيفك بس كنت اصمم الشكل بالفوتوشوب وارسل لهم الصورواعلمهم ان النتيجة راح تكون قريبة منها ما راح تكون نفسها بالضبط، ومع ذلك الكل كان راضي بالنتيجة النهائية.

كل انسان موهوب بطريقة تختلف عن الآخر، حتى لو كان شيء اهلك ما يتفقون معك فيه في البداية، بعد ما شوفون حبك للهواية وانجازاتك راح تختلف نظرتهم وراح تشوف الكل يشاركك بالرأي ويقترح عليك امور جديدة تزيد من متعتك ومن سعادتك.

الهواية تعبّر عنك، عن شخصيتك.. راح تبرز فيكم جوانب ما تشوفونها قبل..
جربوا وجربوا وجربوا، ولا تتوقفون عن البحث الا لما تلقون نفسكم في شيء ترتاحون له ويسعدكم.

كونوا بخير