~Hanan

السلام عليكم ورحمة الله وبركاته,,

قبل أكثر من شهر كتبت ع الطاير عن نظام الانتساب المطور في الجامعه، وبفضل من الله تم قبولي في تخصص إدارة أعمال، لأول مره يكون بنظام الانتساب.

المواد بصراحه، كـــلــــها حسيت إن راح أواجه صعوبة فيها، خصوصاً الرياضيات! من سنيييييييين تخرجت من الثانوي ونسيته كله! في أول محاضرة أمس، بعض المصطلحات تذكرتها وبعضها تذكرت إني كنت “جيدة” في حلّها وبعضها كنت “ممتازة” بس أي هي فيهم، ما أدري

جداً متخوفة من الدراسة، يمكن عشانها إنتساب؟ وإلا عشان التخصص جديد علي؟ ما أدري وش السبب بس أحس بخوف ورهبة كأني أول مره أدخل الجامعة!
كثير قالوا: “ليه ما دخلتي علم اجتماع، انجليزي؟” لسبب ما كنت رافضة فكرة إني أدخل وأدرس لغة إنجليزية إنتساب، خصوصاً إن المعاهد توفر الدبلومات. راح تقولون الشهادة تفرق، صحيح أتفق معكم بهالشيء، بس لا تنسون بعد إن الزمن هذا زمن واسطات، وتخصص اللغة الإنجليزية بالدبلوم يمشي حاله مثل حال البكالوريوس، كل التخصصات ما تفرق شهادتها كثير، والأغلبية (شؤون التوظيف بأي منشأة) راح يركزون أكثر شيء على عدد سنوات الخبرة ومكانها، الشهادة راح تكون آخر شيء يلتفتون له.

يستغرب مني الكثير لما أقولهم ما يهمني الشهادة دبلوم أو بكالوريوس، لأن من جد، من سنين متخرجة من أول دفعات كليات المجتمع وانصدمت من “الديوان” إنه ما يقبل توظيف دبلوم الحاسب الآلي! ودّي أفهم ليه ما يقبلون الحاسب الآلي وهو الآن اهم تخصص في كل “مدرسة” على الأقل..
يعني أول دفعة أتخرج وأنصدم لما أروح أقدم تقول لي “دبلومات صحية بس، أي شيء غيره ما يقدمون عندنا!” كيف راح تكون ردة فعلكم بعد دراسة سنتين ومشوار طويل كل يوم للكلية وتعب ومعاناة مع تغيير المناهج طوال السنتين وفي النهاية ما يقبل الديوان شهادتكم؟

لهالسبب ما عدت أهتم للشهادة كثر ما أهتم للتخصص ومدى رغبتي فيه. وأكون أكثر صراحه معكم كانت رغبتي الأولى “تربية خاصة” بس راجعت نفسي بعدها وحسيت إني ما راح أقواه! قلبي حساس

أمس بدأت الدراسة، شاهدت الموجود، محاضرة رياضيات ومحاضرة مبادئ محاسبة، عندي بنت خالتي تخصصها محاسبة الله يعينها على غثتي..
ما أعرف أي بنت سجلت إدارة أعمال، قريباتي اتخذوا قرارهم من أول يوم تسجيل “علم إجتماع” وعمتي “لغة إنجليزية”. كانت تظن إني سجلت مثلها ضاق صدرها لما عرفت إني غيرت التخصص لإدارة.

الفترة الأخيرة فعلاً كانت فترة ضغوط، كانت ضغوط نفسية أكثر من ضغوط عمل.
التوتر والقلق خلال فترة القبول وإعلان النتائج، وفي مقر العمل كان “تشتيت الموظفات”، إيوه اسميه تشتيت لأنهم ما يوظفون خريجات أصغر في السن بس، لأنهم يسببون عذاب للموظفات الحاليات. ما أدري أيش السبب اللي يمنعهم من توظيف المعلمات؟ الخريجات كثر حبات الرمل بكل مكان والتوظيف “الله يعين”..
يعني ينقلونهم من مكان لمكان، ولفترات قصيرة! يعني ما يمدي المدرسة الجديدة تتعود على نظام الموظفة الجديدة إلا ويجون يرجعونها لمكانها ويجيبون بدلها!

أنا سمعت إنهم يقولون إن ما فيه عجز بالمدارس، الله يحاسب كل من ينطق بهالكلمة وهو في قرارة نفسه عارف العكس.. ما نقول غير حسبي الله ونعم الوكيل..
فعلاً لما الوحدة تختلط بالناس تشوف أشياء كثير، فتحت عيني على شغلات كثيرة كنت في غفلة عنها وغيري ما زال غافل عنها!

غير الشيء هذا، إن أغلب الموظفات اللي كانوا قريبات بالنسبة لي تم نقلهم لمدارس أخرى، كان استقالة إحدى الزميلات. هذا كان السبب الرئيسي لأنه صار فجأه وبدون مقدمات “بالنسبة لي”..
إلى هاليوم ما قدرت اتصل عليها وأبارك لها الوظيفة الجديدة.. إيه صح، استقالت لأن جاتها وظيفة رسمية، ما هي على بند من البنود “التافهه” واللي ما تعطي الموظفة حقها بالكامل..

حاولت أسلّي نفسي لحالي بس ما قدرت، ما كان فيه غير الروايات اللي آخذها معي أقضي وقتي أسرح بعالمها..

وبالبيت عشان أبعد توتر القبول بالجامعة، أشغلت نفسي بمحاولة تدريب يدي أكثر على الحفر على الزجاج. تدربت على شعار العزيزة وعد، أو مثل ما أنا أحب أسميها “ودّ” .. جربته على قطعة زجاج صغيرة احتفظ فيها للتجارب، وبدأت اليوم بالعمل على “الكوب” ما أقدر أقول إني أنجزت لأن ما اشتغلت كثير، بعد المحاضرة راح اكمل الشغل عليه وأحاول أنهيه بحلول نهاية الأسبوع (مدري من وين جات بحلول )

هذي الصورة للعمل مبدئياً، الشكل النهائي راح يكون على الكوب إن شاء الله، قريباً..

يا ويل اللي بيقول ليه ما تسوين ليه ما طلبتوا مني، وعد مرسلة لي من زمـــــان زماااان

أحس إني هذرت واجد اليوم بروح أشوف إذا نزلت محاضرة جديدة وإلا لا عشان أصير طالبة مجتهدة جداً

كونوا بخير